آه لو جيتي تقري معاي

آآهـ لو جيتي تقري معاي
آآهـ لو جيتي تقري معاي
ما أعمل ليك حلات شربات بدون سكر
و ذاتك إنت ما سكر
و نبدأ نقّلب الصفحات و ما أدراك مالصفحات
و فجاءة توهـ عيونا بعيد و نتناقش و نتقابل بدون كلمات
دي قصة ريدنا يا حلوة دا بس لو جيتي تقري معاي
لو جيتي تقري معاي :
أتابع ليك من فيكتوريا مجرى النيل
في يوغندا في الأحراش في نص الليل
وسط دقات طبول أفريقيا مرتفعات و شلالات ملانة هدير
نقطع ميل و نجدع ميل
نقطع ميل و نجدع ميل
و لامن نوصل السودان بخلي النيل
أتابع منو ماسورة تشيل منو و تجيب الموية لي بيتكم
تفوت شارع أفوت شارع
تلف مربوع ألف مربوع
و كل ما تميل معاها أميل
و لامن نوصل قريب داركم راسي يلف و عرقي يسيل
و إتكبكب و إتراجف أنا المهموم تقول ضاربني بردة ليل
و أعاين جاي و أعاين جاي
و أدخل توف مع الماسورة جوة الزير
تنادي حمادة جيب الموية من الزير
و بين ذرات أكسجين و هيدروجين
و إتكرفس في قعر الزير كأني أسير
و من إيدين لى إيديك إنت عديل
تقولي الكوز دام الو تقيل
تدفقي حبة في البلاعة
و من بلاعة لي بلاعة أرجع تاني أبدأ النيل
ما أصلوا النيل بشابه لي و الإتنين دربنا طويل
و ذي النيل بكمل نفسوا في المقرن
و ذيّ النيل كاتم حبو في أعماقوا طول سنوات بدون تعديل
وذي ما النيل على شاطيه يجمع جيل و يدفن جيل
حنتقابل أكيد يا حلوة ليل وراء ليل
و نحفر في صخور الشاطيء قصة حب عظيم و نبيل
دا بس لو جيتي تقري معاي
و إن لم تأتِ وااسفاي و أبداً مش حأقرأ برايّ ...